من المدرج : عملنا قناة في سنة .. ومش عارفين نعمل نظام من 60 سنة !!

في عام واحد قام فيه كل شخص بما يجب ان يقوم به في مجاله او مجال عمله وهو حفر قناة السويس الجديدة او سمها كما تشاء .

المهم ان هناك 35 كيلو متر كانوا عبارة عن صحراء تماما في عام واحد تم حفر قناة جديدة بهذه المساحة وهو عمل هندسي وميداني يكاد يكون اعجازي .. انت معترف به او لا تعترف به فهذه مشكلة أخرى .

المهم ان الجميع قام بما يجب عليه ان يقوم به فكانت النتيجة مبهرة .. كانت الفرحة عارمة بأننا ( نستطيع ) .

وعندما قررنا ان نحارب ونحرر ارضنا .. قام كل شخص بما يجب عليه ان يقوم به وكانت النتيجة مبهرة ورائعة وانتصرنا على العدو الصهيوني وانهينا اسطورة جيشه الذي لا يقهر الى الأبد .

هذا يدل على اننا نستطيع ان نغير أشياء كثيرة في الواقع الذي نعيشه فيه فقط اذا اردنا ثم قام كل شخص بما يجب عليه ان يفعله والتزمنا بمواعيد محددة ننهي فيها ما بدأناه .

الا في النظام .. وسيبكم من النظام ككل علشان ممكن ناخد فيه سنة نتكلم عليه انا حتكلم عن الكورة .. الكورة بس .

تصدقو ان احنا الدوري خلص خلاص وحنبتدي دوري تاني واحنا مش عارفين هل الملاعب أصبحت جاهزة لاستقبال الجماهير ولا لا ؟؟ وهل استوفت كل ما طلبته النيابة من اجل عودة الجماهير للملاعب ولا لا ؟؟

طيب تخيلو ان احنا لسه لحد دلوقتي مش عارفين هو أصلا الدوري القادم المفروض يبقى فيه جمهور ولا لا ؟

طيب بلاش ديه تخيلو ان احنا ( غصب عن عنا ) لو الأهلي والزمالك  وصلو نهائي الكونفيدرالية مع بعض حيلعبو في مصر بوجود الجماهير ؟؟ هل فكرتو فيها حتمشي ازاي يعني ولا لما يجي وقتها حنبدأ نفكر ؟؟

طيب بلاش ديه ولا ديه .. حضرتكم عارفين ان احنا لحد دلوقتي مش عارفين موعد بدأ الدوري الجديد ؟؟

طيب تعرفو ان احنا مش عارفين مواعيد مباريات كأس مصر اللي بتتلعب  أصلا دلوقتي ومش عارفين هو المباريات المتبقية فيه حتتلعب امتى وفين وازاي ؟؟

طيب تعرفو حضرتكم .. ان احنا مش عارفين لحد دلوقتي نوقف الإعلاميين عند حدهم ونمنعهم انهم ( يشرشحو لبعض على الهواء ) كل يوم ؟؟

طيب تعرفو ان احنا لحد دلوقتي مش عارفين هي ايه قواعد انتقال اللاعبين  داخل مصر وبين الأندية المصرية وهل هي قائمة على قوانين ونظم ولا مبنية على ( حبيبي وابن عمي ) ؟؟

طيب تعرفو ان احنا الى الأن لم يخرج علينا مسئول في اتحاد الكرة يقول لنا ما هي خطة إعداد مصر لتصفيات كأس العالم وكأس الأمم الأفريقية وهدف الفريق من المشاركة في التصفيات هذه ( يعني  مثلا هدفنا الوصول الى كأس العالم فده يبقى تارجيت ويتحط على الناس والناس تتحاسب عليه وهكذا .. والفوز بكأس الأمم ده بردو تارجيت ونتحاسب عليه وهكذا وهكذا !!

طيب تخيلو بقى ان احنا قاعدين بقالنا اكتر من ثلاث سنوات بدون مجلس شعب ( بذمتكم حد حاسس بانه مفتقد أي حاجة ؟؟؟؟

احنا حفرنا القناة في سنة .. لكن غالبا محتاجين نحفر العقول الخربة في عشر سنين او اكثر .... والله أعلم !